మా పాఠశాల విద్యార్థి రాసిన కథ వార్త పేపర్లో

సమస్యాపూరణం

సమస్య :-
భార్యయే అత్తఅయ్యె నీవసుధయందు

*తే.గీ**

మరదలన్న చాలా ప్రేమ వరదపొంగె
ఇంటివారిని యెప్పించి జంట జేయ
మేళముల పెళ్లి జరగగా మేనమామ
భార్యయే యత్తయయ్యె నీ వసుధయందు
            ......................✍చక్రి

సమస్యాపూరణం

సమస్య :-
పాప పాలించె రాజ్యంబు పావనముగ

*తే.గీ**

తల్లిదండ్రుల మాటలు తప్పకుండ
కాననందు వసించిన కరుణ మూర్తి
రావణుని వధించినయోధ్య రాముని కను
పాప పాలించె రాజ్యంబు పావనముగ
             ....................✍చక్రి

సమస్యాపూరణం

సమస్య :-
"పగవానికి దాసుఁడగుటె పౌరుషము గదా"

1.
*కందం**

తగిన విధమైన కోళ్ళను
జగడము సంక్రాంతి నాడు సలుపుట కొరకై
నిగనిగ లాడునటుల మే
పగ,వానికి దాసుఁడగుటె పౌరుషము గదా!

2.
*కందం**

తగవులు మాన్పించు కొరకు
పగవానికి దాసుఁడగుటె పౌరుషము గదా!
రగిలెడు మిర్చీ సినిమా
సొగసు లొలుకునట్టి కనులు జూడగ  నిజమౌ
           ......................✍చక్రి

సమస్యాపూరణం

సమస్య :-
"సవతి యున్న సతికి సౌఖ్యమబ్బు"

*ఆ.వె**

చేతికందునట్లు చిరు వస్తువు లమరి
పొగయు రాక నీటి పోక యున్న
నాధునికత గల్గి యన్ని హంగులతో ర
సవతి యున్న సతికి సౌఖ్యమబ్బు
          .....................✍చక్రి

రసవతి : వంటఇల్లు

నిషిద్ధాక్షరి

*నిషిద్ధాక్షరి* :-

*స* కార' ప్రయోగం లేకుండా

సంక్రాంతి పర్వదినాన్ని గురించి

స్వేచ్ఛాఛందంలో పద్యం వ్రాయండి.

*ఆ.వె**

1.

పంటలన్ని పండి పంటచేతికి రాగ

గాదెలన్ని నిండి కలిగెముదము

ముచ్చట గొలిపేటి ముంగిట ముగ్గులు

పల్లె నందు పొంగె పాలపొంగు

2.

భోగి మంటలిచ్చు భోగభాగ్యమ్ములు

పశుల పూజ లిచ్చు పాడిపంట

కొత్త నూపునిచ్చు కోడిపందెమ్ములు

చూడముచ్చటాయె చూచునంత

3.

మకర రాశి లోకి మారునర్కని కక్ష్య

నుత్తరాయణమ్మ కొత్త కాంతి

పుణ్య కాలమనియు పూజ్య భీష్ముండును

వేచిచూచి పలికె వీడుకోలు

            ...............‌‌....✍చక్రి

*మిత్రులందరికీ సంక్రాంతి శుభాకాంక్షలు*